PHUNG AICHUK O KHAHAMNI NOGO

Tokla pungte kheno dro dro Sal nokha o nugjak ti kha tei bini jik jik pohor nokhla o pao. Buphang yaphang rok ni beser basar twibo salni a pohor jlik jlak khe chwngwi nuhur jago.
Khaham songni nokni nokhla o kisa misa khumphang tongmani aborok pohorno manwi kwsrang wngwi lok lok wngrwrwgo. Para o tep tep khe khorang kasa roro tei salni ni chwng chwng pohor wngtwi horni mwnagno uslewi rohoro.

Chini Khaham khe omtwi tongthok mithok jora o bini bisna o putum khe kwlaiwi imangrok nukterwi thujak. Tamorok ba aswk imang nuktekha Khahamni mwkhang mwnwi srusru wngjak. Imangrok bwswk se tongthok eba khe kirima chwngno rwi man abo jotono saimano. O jora o Khaham ni mwkhango to kirima nukjakya, tongthokroro imangno nuk khana hwnwi sijago. Tamo khe chwng kaham khe sio, jephru no imango jotoni slai tongthok jora phaio aphru no bahai jani chini muktrwi paiwi thango tei chwng sichajagwi thango.

Chini Khahamni mwkhango aswk tongthok nukjagwi tongma bai, achomsa a jora o no gorini alarm phankhe hilwgwi tring-tring-tring pungwi rwte kha. Ayango sabo bo redu bo sarugwi rwkha ba, phung aini rwchapmung phan khe khna hor jakkha. Aphru no nok gana ni lama bwskango domdom khe keche keche punglaiwi burarok morning walk himtrema khwnajago. Tokrokbo tete tete chichi chichi khe birlaima khnahorkha. Muksi muksi khe mokol phiyoktwi Khaham kisa mwnwiroro khe phurki ni beser twi pajak satungno mukumtwi mukumtwi naisigo. Imang muitu khlai kisa tongthogo tei kisa khahbjago, saichung saiching hwntero " I !, tamo ba o jorao ba ma sichakha, aswk naithok imang nukmase, Naithoktini yak romna naima se , eh". Omtwi uansuktwtwi no Khaham twrwk twrwk khe pom khe kwlaiwi muktrwi kuphuro kwmaiwi thangjao kha.