REPUBLIC OF ZAILAND
(CHANDRAMANI DEBBARMA, IFS)
I
Bolong hathai himphru,
Achumsa belai lengphru
Nugwi kha siyari lob lob kuphur hayung,
Zailand bini bumung.
Chisa kuchug samung nog,
Chinwi tongmani nog ---
Zailand ni rajdhani “Kwmaliya City”,
Rasa nog bwsa o tongo chati.
Yagra ari achrong,
Yagsi ari twirong,
Kwmaliya City ganao boiyarung
Zai gwnang boorokrog mwkhang kwchwng kwtwng.
II
Zailand o police army kwrwi,
Kwrwi silai patham,
Tongo kepeleng lam.
President, P.M ni bulletproof malkhung kwrwi
Bongni tongo pharuk model soundless birkhung,
Glass ni nukhung.
O birkhung foot chi kuchugtwi biro
Thutai phano baiya
Automatic shock absorber tongo.
Prime minister salo uaisa kami sakatwi biro,
“Shanti ni bani” tuno, premer bani tuno.
Langmani chamung, mangni chamung tuno
Million kaisa bosong borok no.
III
Republic of Zailand borokrog
Bongni jaiti no Zai-ish hwno.
Father of modern Zailand ni mung – Chirothchak
National tok – tog rangchak
National animal – Mwswirangchak
National khum – Khumpui.
National phang – agar
Zailand Dharmo ni mung – “Love-ism”
Ha tola tongo thograngchak, rangchak hoku
Ha gwnangwi agar satraini mukumu
Thaijak podre pod bwthai,
Salbrum ni chathai.
Zai-ish rog han-chaya
Chao mayungni ada.
Mang bwthar ya, muihan cha ya –
Puntog tanmani cherairog nugya
Aboni bagwi Violence kwrwi.
O Zailand o hada kuai manthog ya
Chuak arak siniya.
Hamjak mwsalai rwchablai samungtangkrak se
Zai-ish rogni tongthogma.
Chao mai kisa – chao bwthai kwbang,
Bwlai ni mui, dud ni manwi.
Podre pod bwthai kaijak,
Bebak ni tongo orchard,
Tongo rubber phang, gwnang bolong.
IV
Zailand ni borogrog kiyokjak,
Gyan Bigyan kuchugo achukjak.
Quality number one borokrog.
Geneti Engineering ni huijak elem
Bosongno tisakha rem rem.
Samungrog mechanized, computerized.
Borokrog jolina rwngya, nasle na rwngya
Bunani bwtharlaima rwngya.
Republic wngmani Silver Jubilee ni sal
Father of Nation thwimani chinwi bisi ulo o
Bisi chinwiba sal o
O Zai-ish jaiti kiyokjak kuchuk,
Belai siyan.
Modern Democratic ninangmani chengphru le
Phiya thwi kha borok kwbang.
Tabuk kwchang kwchang.
Genetic Engineering ni elem –
Rwkha bebak borok ni sagdug sag eng
Dalsa ahai soljak.
Bwrwirokno naisik nai di bebak no ek,
Chwla bo bebak no ek ahai.
Bebak borok ni bwkha o hamjakma kuplung
Bwkha naithok.
Aboni bagwi bwrwi naithok seglai ya,
Kaiphru ualaima kwrwi.
Zailand ni borokrog hik masa – sai masa
Nukhung naithok, Nuclear Family.
Aroni borokrog kwsrang,
Sag mangni bebank nanagmani,
Phola ni nang mani swnamna kwrwng.
V
Zailand parliament o
99 khorog sagbiring tongo
Berem kwnwi chaplaima
Center tai kami –
Kamirogo bebak nangmani manthogo
Chaplainairog kami o tongo.
Bong ni bisi ni samung ni berem;
Budget o puilani rem –
Kamirogono “City of God” swnamnani;
Gene bank swnamnani
Bebak cherai no gene injection rwnani
Kaham Character da nani –
Okra rogni gene bai treatment khwlainani.
Swrwngma; Hamjakma Bataimung
Mwnam kwrwi, yongkha kwrwi khlainani.
VI
Borok bai borok hamjakma
Kisa kebel no khairogma chubama,
Tai khakuphur sima kolom,
Rwlainani borom –
Phwrwngma tai bataima bwtang
O Zailand ni School Syllabus.
Charity samung, chubama samung
Cheraini simi rem rem phwrwngo.
“Manobta” kubui borokni model –
Bebak chwrai no swnamjago;
Pancha indrio no sokomor ni bagwi
Jyog biyam Compulsory tongo.
VII
Zailand ni borok kaham kwrag,
Kotor bemar manthok ya.
Natural cure raida romwi
Belai naithok sak.
Life belai perfect.
Nwichiba bisi o chinwi borok se thwi o.
Zai-ish rok zai gwnang bosong.
Chibai, kwthalai, mwnwima kwbang.
Tongthokma bisi –
Kwthar tongo mare marai yar kiching.
VIII
Gene Technology ni elem,
Ognai bohogni bwsarok ni –
Injection rw o kaham gene bai.
Choritro ham ya, bemar ham ya gene
Rasu wi tikhlai o.
Kaham gene bai achai rw o naithok cherai
“Superman” cherai.
Abo ni bagwi o Zailand –
Godland no, chuk ha no solokha.
Kwthar sikla sikli rwmai rwmai
Hamjakma simi bongni swami.
Mwtai nogni satrai hoku motomma ahai,
Motha Jisu Khristo achaima rwgwi tongthokma ahai
Zailand nogo nogo salbrumbrum tongthok.
IX
Zailand o tongo 99 muluk,
Hachuk hauar thena kuchug.
Bisi kwtham o uaisa chong sai –
Sai wi kwragno member chonglai.
O chonglaima raida hwnkhe –
Bisi bisi sabo khairogma kwrag,
Sabo chubama kwrag
Sabo hamjagma kwrag
Batai laimung panda wngo.
O Batailaimung o Gold Medal mannai
Chongjago cabinet minister.
Silver Jubilee bronze mannairog member wngo.
Kwmaliya City rajakhor o
Parliament kwtal o.
X
Zailand ni nokha kwlwi
Buphang bising bising kamirogo mwrwi mwrwi.
Kukila topetope toksa rangchak
Ha o kuplung rangchak.
Nightingle ni khorang kwtwi
Motomsai tongo sampari khumpui –
Ha gwnangwi.
Nobar sib sib
Sumui pungma ahai
Sachlang ni hapor kwsai.
Ranphlaiya twisa –
Kabna nang ya ha ni bwsa
Telekar tongthok o Zailand ha o.
posted by B Deb Barma at 11:46 PM
0 comments
